تيوتريات . . بلال فضل . . مش حاتجيب اللي عليك ؟

كتب بلال فضل في حسابه على تويتر :

"غير صحيح أن المسلمين فقط من سيدخلون الجنة لأن الله لم يخلق مليارات البشر لكي يقوموا بدور الكومبارس في مشهد النهاية, وأن رحمة ربنا تؤكد أنه لن يدخل النار شخص عبده علي طريقته الخاصة".
 

أقول لصديقنا الكاتب بلال فضل . . ما دام الأمر كده . . فين اللي عليك بقى ؟

 ما تقوليش إيه اللي عليا .

يعني لو مثلاً حضرتك أنا ليا عليك دين . . و قلتلك ابعتهولي على العنوان الفلاني . . رحت أنت باعتهولي على عنوان ثاني على مزاجك . . يبقى أنت سديت الدين و لا لأ ؟ يبقى سديته ؟ أديت القيمة آه فعلاً . . 

لكن  وصلني أنا ديني المستحق عليك ولا لأ ؟

لأ . . ماوصلش . .

يبقى من حقي  اقولك انت ما سديتش الدين . . و أطاالبك لبه ,  و كمان أسجنك بيه و لا لأ .

 لله المثل الأعلى . . 

الله علم الناس تعبده عن طريق النبي صلى الله عليه و سلم و قال لهم :

" وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ وَهُوَ فِي الْآخِرَةِ مِنَ الْخَاسِرِينَ" ( آل عمران 85) . . 

طب لو هما صمموا يعبدوا الله على ما تهوى الأنفس . . يبقى كده أدوا العبادة زي ما ربنا عايزها و لا زي ما هم بيهووا و على مزاجهم ؟ 

زي ما هم بيهووا و على مزاجهم . . يبقى بيعبدوا هواهم . . مش بيعبدوا ربنا 

ويبقى ربنا لم يظلمهم لما يدخلهم النار يوم القيامة .

وكمان ياعم بلال . . اشمعنى المسلمين اللي بتطالبهم يقولوا كده . . ما النصارى بيقولوا إن هما بس اللي حايدخلوا الجنة و اليهود بيقولوا إن هم بس اللي حايدخلوا الجنة .

ليه لازم بس نجلد ذواتنا . . و ليه لازم المسلم هو اللي دايما غلطان . . و ليه مجاملة كل الناس على حساب الدين .

هو احنا ما ينفعش نحاول نظهر بمظهر النخبة و احنا محافظني على ديننا أبداً ؟

ربنا يهدينا و يهديك

باقولك إيه . . 

هات اللي عليك بقى . . مش ليا . . لربك اللي حاتعرض عليه و حيداً . . و لاتدري متى يكون ذلك . . 

فلربما كنت تكتب مبتهجاً . . و كفنك اتحط على الرف عند بائع الأكفان ينتظر لأنهم سوف يشترونه لك بعد قليل . . مش بابشر عليك و الله . . اسأل الله لك عمراً مديداَ سعيداً في دين و صحة و عافية . . لكن عايزك تفكر . . هل ربنا بيحبك و يحب منك هذا الكلام ؟ ولا هو ساخط عليك لأنك تصف ماكتبه الله في القرآن من دخول غير المسلم لله في الآخرة إلى النار بنفس المنظق الذي تتحدث به عن سيناريوهاتك و لا حول و لا قوة إلا بالله ؟.

هات اللي عليك . . اللي عليك لربنا. . و قل لربك " سمعنا و أطعنا غفرانك ربنا و إليك و المصير "